...அப்புறம் கடவுளுக்கு என்ன தேவை?

ஜெனீபர் நியூயார்க் நகர தீயணைப்பு படையைச் சேர்ந்தவர். நியூயார்க் நகரின் இரட்டை கோபுரங்கள் இஸ்லாமிய பயங்கரவாதைகளால் தாக்கி அழிக்கப்பட்ட போது அங்கு தீயணைப்பு பணியாற்றியவர் அவர். அந்த கொடூரங்களை நேரடியாக பார்த்தது அவரை வெகுவாக பாதித்திருந்தது.

அக்டோபர் 2002 அன்று மாதா அமிர்தானந்தமயி அம்மா நியூயார்க் வந்திருந்தார்கள். 'உலக அமைதிக்காக ஆன்மிக பெண்களின் முயற்சி அமைப்பு எனும் இயக்கத்தில் உரையாற்றிட அம்மா அழைக்கப்பட்டிருந்தார். அங்கே அக்டோ பர் 6 ஆம் தியதி மக்களை சந்திக்கும் நிகழ்ச்சியில் அம்மாவை பார்க்க வந்தவர்களுள் ஒருவர் ஜெனீபர் ஆவார். ஜெனீபர் அந்த துன்பச்சம்பவத்தின் தாக்கத்திலிருந்து இன்னமும் விடுபட்டிருக்கவில்லை. அம்மா ஜெனீபரை அன்போடு அணைத்து அவரது கண்ணீரைத் துடைத்துவிட்டார். சம்பவம் நடந்த இடத்திலிருந்து ஒரு கல்லையும் நசுங்கிய ஒரு சாவியையும் ஜெனீபர் கொண்டு வந்திருந்தார். அவற்றை அம்மாவிடம் காட்டிய ஜெனீபர், "இவற்றை எதற்கு எடுத்து வந்திருக்கிறேன் என்று தெரியாமலேயே எடுத்து வந்திருக்கிறேன். ஒரு வேளை என் மனம் அம்மாவுடன் இன்று நடக்கப் போகும் இந்த விலைமதிப்பற்ற தொடர்பைக் குறித்து அன்றே அறிந்திருக்க வேண்டும். அங்கே உயிரிழந்தோரின் அழுகுரல் இதில் இருக்கிறது." என்று சொல்லியவாறு கொடுத்தார். அம்மா அவற்றினை தமது முகத்தோடு சேர்த்து முத்தமிட்டார். ஜெனீபரின் முகம் தெளிவடைந்தது. ஜெனீபருடன் வந்த ஓல்ஸன் அம்மாவிடம், "ஜெனீபருக்கு குறிப்பிட்டு சொல்லும்படியான மதநம்பிக்கையோ இறைநம்பிக்கையோ இல்லை. ஆனா துன்பப்படுபவர்கள் மீது அன்பும் கருணையும் உண்டு. இவர் வெளிப்படையாக ஒரு இறைவனை வணங்க வேண்டிய அவசியம் உண்டா?" என்று வினவினார்.
"துன்பப்படுபவர்களிடம் காட்டும் அன்பும் கருணையும் தான் இறைவன். அந்த மனமிருந்தால் பின்னர் இறைவன் எதற்காக?" என்றார் அம்மா.
(நன்றி : தாய்மையே விழித்தெழு...ஸ்ரீ மாதா அமிர்தானந்த மயி தேவி, பக்.10-11)

---

பெண் விடுதலைக்காக அம்மா அமிர்தானந்த மயி தேவியின் தெய்வீக அருள் நிறைந்த வார்த்தைகளால் இந்து சமுதாயத்திற்கும் உலக சமூகத்திற்கும் விடுக்கப்படும் இந்து தருமத்தின் அறைகூவல்

• 
  
  கடந்தகால சமூகம் படைத்த சட்டதிட்டங்களும் குருட்டு நம்பிக்கைகளும் இன்று பெண்ணுக்கு எதிராக நிலை பெற்றுள்ளன. சுரண்டுவதற்கும் அடக்கி ஆள்வதற்கும் ஆண்கள் உருவாக்கிய காட்டுமிராண்டித்தனமான சம்பிரதாயங்களும் தொடர்கின்றன. இவை எல்லாம் சேர்ந்து உருவாக்கிய சிலந்தி வலைக்குள் சிக்கிக் கிடக்கிறது பெண்ணின் மனம். அவளுடைய மனமே அவளை வசியம் செய்து வைத்திருக்கிறது. இந்த வளையத்திலிருந்து வெளிவர அவளுக்கு அவளே உதவ வேண்டும்.
  
• 
  பெண் தீரமுள்ளவள் ஆக வேண்டும். அவளை வளர அனுமதிக்காத சமூகத்தின் சட்டதிட்டங்களுடன் போராட தேவையான சக்தி அவளிடம் இருக்கிறது. இது அம்மாவின் சொந்த அனுபவமாகும். ஆலயங்களில் ஆராதனை செய்யவும் விக்கிரகங்களை பிரதிஷ்டை செய்யவும் வேத மந்திரங்களை ஓதவும் சமூகத்தில் பெண்களுக்கு உரிமை அளிக்கப்படவில்லை. ஆனால் அம்மா அத்தகைய செயல்களை பெண்களைக் கொண்டு செய்ய வைத்திருக்கிறேன். இதற்கு சிலர் எதிர்ப்பு குரல்களை எழுப்பினார்கள். அப்படி எதிர்த்தவர்களிடம் அம்மா "ஆண்-பெண் என்ற பாகுபாடில்லாத இறைவனையே நாங்கள் வணங்குகிறோம்" என்றேன். சிலர் இவ்விதம் எதிர்த்த போதிலும் பெரும்பாலோர் அம்மாவின் செயலை ஆதரிக்கவே செய்தனர். ஏனெனில் இதுபோன்ற தடைகளை விதிப்பது பாரத பண்பாட்டுக்கு உகந்தததல்ல. பெண்களை அடக்கி ஆள்வதற்காகவும் சுரண்டுவதற்காகவும் உயர் சமூகத்தை சேர்ந்த ஆண்கள் உருவாக்கிய சட்டதிட்டங்களே இவை என ஊகிக்கலாம். இவை இடைக்காலத்தில் ஏற்பட்ட வழக்கமே அன்றி பழங்கால பாரதத்தில் இவ்வழக்கம் இல்லை.
  
• 
  பாரதத்தில் இறைவனை ஒரு நாளும் ஆண் வடிவில் மட்டும் ஆராதிக்கவில்லை. பெண் வடிவில் தாயாக, தேவியாக, படைத்தல் காத்தல் அழித்தல் என முத்தொழிலையும் நிர்வகிப்பவளாக , பல வடிவங்களிலும், பாவங்களிலும் ஆராதிக்கிறார்கள். ...பெண்ணை பெற்றெடுத்த தாயாகவும் ஜகதாம்பிகையாகவும் ஆராதிக்கும் மகிமை மிக்க பாரம்பரியம் பாரதத்தின் தனிச்சிறப்பாகும். இயற்கை முழுவதையும் தாயாகவே பாரத மக்கள் காண்கின்றனர்.
  
• 
  பிரசவ வேதனையையும் கஷ்டங்களையும் சகித்துக்கொண்டு மதத்தலைவர்களுக்கும் இறைவனின் அவதாரங்களுக்கும் பிறப்பளிக்கப் பெண் வேண்டும். உண்மை இதுவாக இருப்பினும் வாழ்நாள் முழுவதும் அவள் ஆணுக்கு அடிமையாகவே இருக்க வேண்டும் என்று கூறுவது பொருளில்லாமலும் அறிவுக்கு ஒவ்வாமலும் இருப்பதை யாரும் சிந்திப்பதில்லை என்பது வருத்தத்திற்குரிய விசயமாகும்.
  
• 
  உண்மையான மதங்களால் பெண்ணை ஒதுக்கிவிட முடியாது. இறைவனை அனுபூதியில் அறிந்தவர்களால் ஆண்-பெண்ணை பேத புத்தியுடன் காண முடியாது. அவர்கள் சமநோக்கு உள்ளவர்களாகவே இருப்பார்கள். பெண்ணைத் தரம் தாழ்த்துகிற நியதிகள் எங்காவது வழக்கத்தில் இருந்தால் அது ஆணின் சுயநலத்தால் உருவாக்கப்பட்டவையேயன்றி இறைவனின் வார்த்தைகள் அல்ல.
  
• 
  ஆண் செய்யக்கூடியவை அனைத்தையும் பெண்ணால் செய்ய முடியும். சொல்லப்போனால் அதை விடக் கூடுதலாகவே அவளால் செய்யமுடியும். புத்தி சக்தியிலும் திறமைகளிலும் பெண் ஆணைவிடத் தாழ்ந்தவள் அல்ல. எல்லா துறைகளிலும் பெண்ணால் அசாதாரணமான வெற்றியைப் பெறமுடியும். அதற்கான இச்சா சக்தியும் செய திறமையும் அவளுக்கு இருக்கிறது. இதயத்தூய்மையும் அறிவுச்செல்வமும் அவளுக்கு உண்டு.