பண்பால் உயர்ந்து நிற்கும் மா.சிவகுமார்

மா.சிவகுமார் எனும் வலைப்பதிவர் பாரத சமுதாயத்தை மிக மோசமாக வர்ணித்தத்தை தொடர்ந்து அவரை கடுமையாக சாடியிருந்தேன். அந்த கடுமையான சாடல்கள் எவருக்கும் ஆத்திரத்தையே ஏற்படுத்தும். என்ற போதிலும் அதற்கும் மேலாக வார்த்தைகளுக்கு அப்பால் சென்று என்னைப்போன்ற ஒரு சாராசரி இந்தியனின் நியாயமான கோப உணர்வை புரிந்துகொண்டு அதன் நியாயத்தை கிரகித்துக்கொண்டு ஒரு பதிவை எழுதியிருக்கிறார் திரு.மா.சிவகுமார். இப்பதிவை அவர் மன்னிப்பு என தலைப்பிட்டிருந்தாலும் கூட அது உண்மையில் அவரது பண்பாட்டின் உயர்வினையே காட்டக்கூடியதாகும். நாம் அனைவருமே தவறிழைப்பவர்கள்தாம். தவறினை உணர்ந்திடும் பட்சத்தில் அதனை வெளிப்படையாக சொல்லி அதற்காக வருத்தம் தெரிவிக்கும் மாண்பு நம்மில் எத்தனை பேரிடம் உள்ளது? இப்போதும் மா.சிவகுமாரின் நிலைப்பாடுகள் பலவற்றை நான் ஏற்றுக்கொள்ளவில்லை. அவரும் எனது நிலைப்பாடுகளை எவ்விதத்திலும் ஏற்பார் என நான் கருதவில்லை. ஆனால் இந்த குறிப்பிட்ட அவரது பண்பாடு நாம் அனைவருமே பார்த்து கற்கவேண்டிய ஒன்று என கருதுகிறேன். அவரது நேர்மைதிறம் இவ்விசயத்தில் மிகவும் சிறந்தது. பாராட்டப்பட வேண்டியது. அதற்கும் மேல் பின்பற்றப்பட வேண்டியது. நிச்சயமாக இந்த விசயத்தில் உன்னத பண்பினை கற்றுத்தரும் ஆசானாகவே உங்களை மதிக்கிறேன். பாரத பண்பாட்டின் ஒரு சிறந்த பிரதிநிதியாகவே தாங்கள் திகழ்கிறீர்கள்.