வெளிவராத/எடுக்கப்படாத ஆவணப்படம்; மறைக்கப்படும் இறுதித்தீர்வுகள்

---

குஜராத் கலவரம் குறித்த என் பதிவிற்கு ஒருவர் ஒரு குறிப்பிட்ட பிரச்சாரப்படத்தை வைத்து எதிர்வினையாற்றியிருந்தார். அது குறித்து ஏற்கனவே நான் எதிர்வினையாற்றியுள்ளேன். போனபதிவின் பின்னோட்டத்தில் அதனை காண்க. இங்கு எவ்வாறு 'ஆவணப்படம்' என்கிற பெயரில் பிரச்சாரப்படங்கள் எடுப்பவர்கள் புறக்கணிக்கும் உண்மையாக நடத்தப்படும் இறுதித்தீர்வுகளில் ஒன்றை அடிக்கோடிட்டு காட்ட முயற்சித்துள்ளேன். கவனியுங்கள்...இன்றைய தினத்தில் எத்தனை குஜராத் முஸ்லீம்கள் அகதி முகாம்களில் வசிக்கிறார்கள்? ஆனால் ஆண்டுக்கணக்கில் இலட்சக்கணக்கான வனவாசிகளும், காஷ்மீர் பண்டிட்களும் அகதி முகாம்களில் விலங்குகளை விடக் கேவலமாக வாழ்கின்றனர். மிக மெதுவான ஆனால் உறுதியான சமுதாய அழிவினை எதிர்-நோக்குகின்றனர். அவர்கள் தம் வீடு-திரும்பல் இன்று ஏறத்தாழ நடவாத காரியமாகிவிட்டது. ஆனால் இவர்கள் குறித்து எவ்வித ஆவணங்களும் இல்லையே ஏன்? உங்கள் மனச்சாட்சிக்கு இப்பதிவை நான் சமர்ப்பிக்கிறேன்.

---

நல்ல காங்கிரீட் கட்டிடங்கள். பல குடும்பத்தினர் இருக்கின்றனர். சமையல் நடந்து கொண்டிருக்கிறது. பலர் உறவினர்களை இழந்த சோகங்களில் இருக்கிறார்கள். காயம் பட்ட கட்டுப்போட்ட கை, கால், முகங்களுடன் குழந்தைகள். இந்தியாவின் முதன்மை தேர்தல் அதிகாரி அவர்களை நலம் விசாரிக்கிறார். அருகிலுள்ள ஐஏஎஸ் அதிகாரியை அவர்களுக்கு போதுமான ஏற்பாடுகளை செய்யாமைக்காக திட்டுகிறார். [தொலைக்காட்சி செய்தியிலிருந்து] அடுத்ததாக அதே முகாம்...பாரத குடியரசு தலைவர் பார்வையிடுகிறார்...அதே முகாம் ...வேறுபல முக்கிய அதிகாரிகள் ஊடகத்தினர் அரசு-சாரா அமைப்பினை சாராதவர்கள் என பலர் அதனை பார்வையிடுதல். ...இனி மற்றொரு அகதி முகாம். மண் பூச்சு தரை...சில கிழிந்த சில்பாலின் ஷீட் கூரைகள். ஒரு வேன் வந்து நிற்கிறது. இரு காவலர்களுடன் சிலர் சாக்கு மூட்டைகளை வெளியேற்றுகிறார்கள். சற்று தூரத்தில் ஒரு அவலக்குரல் எழுகிறது. வயிற்றுப்போக்கினால் ஒரு குழந்தை இறந்துவிட்டது. ஓசை கேட்டு திரும்பிய ஒருகாவலர் விஷயம் தெரிந்தவுடன் இதெல்லாம் இங்கு சகஜம் என்கிற ரீதியில் திரும்பிக்கொள்கிறார். டாக்டர் பி.சி.தாஸ், மாநில அரசின் சிறப்பு மருத்துவ குழு உறுப்பினர், கூறுகிறார், " கஷ்டம்தாங்க, இதுவரை 700 பேர் பார்த்துட்டேன். மோசமான தண்ணீருங்க, நல்ல சத்தான ஆகாரம் கிடையாது. சிறப்பு மருத்துவ குழுன்னாலும் வேண்டிய அளவு மருந்தும் கிடையாது." அப்படியே காமிரா ஒரு பத்து வயது சிறுவனை நோக்கி செல்கிறது. அந்தச் சிறுவனைப் பார்க்கையில் உங்களுக்கு ஒருவேளை கட்டியணைத்து ஆறுதல் சொல்லவேண்டும் என்றெல்லாம் தோன்றாது. ஏனெனில் அவன் மேலெல்லாம் சிரங்குகள். அவன் கூறுகிறான், "எங்க அப்பா வயத்துபோக்குல ஒரு வாரத்துக்கு முன்னாடி செத்தாச்சுங்க. எங்க அம்மாவுக்கும் நல்லா உடம்பு முடியல்லீங்க அவங்களும் செத்தாச்சுன்னா நான் அனாதையாடுவேங்க." பத்துவயது பிண்டு ரியாங்கின் முகத்திலிருந்து காமிரா நகர்ந்து அந்த முகாமின் பல பகுதிகளை காட்டுகிறது. லால் தங்க்வாலாவினை அடுத்ததாக காமிரா காட்டுகிறது . மிஸோரம் முதலமைச்சர். அவர் தீவிர கிறிஸ்தவரும் கூட என்பதை அவரது மேசை மீதிலேயே இருக்கும் சிலுவை காட்டுகிறது. "அவர்களெல்லாம் அயலாட்கள். அவர்களுக்கு திரிபுராதான் சொந்த ஊர். அங்கேயேயிருக்க வேண்டியதுதானே. அங்கிருந்து இங்கு வந்த வந்தேறிகள், இங்கு தனி மாவட்டம் கேட்டால் எப்படி?" கேள்வியாளர் கேட்கிறார், " ஆனா அவுங்க இங்கயே வாழ்ந்ததாவும், கொலை பாலியியல் பலாத்காரம் கலவரம் இதுக்கு பயந்து அங்கே அகதியா போயிட்டதாவும் சொல்றாங்களே!" முதலமைச்சரின் முகம் மாறித்தெளிகிறது."இது ஆர்,எஸ்.எஸ் பிரச்சாரங்க. ரியாங்குகள் ஹிந்துக்கள் கிடையாது. அப்ப அவுங்களுக்காக ஆர்.எஸ்.எஸ் எப்படி குரல் கொடுக்கலாம்?" அடுத்ததாக காமிரா நகர்கிறது மிஸோரமெங்கும் நிமிர்ந்து நிற்கும் சர்ச்கள். என்டிடிவியின் செய்திதொகுப்பிலிருந்து ஒரு பகுதி காட்டப்படுகிறது, "இங்கு தேர்தல்களில் சர்ச்சின் கட்டுப்பாடு உள்ளது. சர்ச்சின் ஆதரவு பெற்ற வாக்காளர்களே இங்கு வெல்ல முடியும். நிற்கமுடியும்." ரியாங்களுக்கு எதிரான கலவரங்களில் ஈடுபட்ட மிசோ இளைஞர் அமைப்பின் தொடக்கம் மிஷினரிகளால் என்பதையும் எவ்வாறு மிஸோக்கள் எவ்வாறு மிஷினரிகளால் 'தேர்ந்தெடுக்கப்பட்ட இனமாக' கூறி மேன்மைப்படுத்தப்பட்டனர் என்பதையும் அந்த விவரணப்படம் விளக்கலாம், உலகளாவிய மிசோ கிறிஸ்தவ இணைப்பமைப்பின் பிரகடனம் கூறும் வாசகத்தை இந்நேரம் காட்டலாம்: "We believe that the Bible is the complete and revealed Word of God, fully inspired and without error in the original writings; and that it has supreme authority in all matters of faith and conduct....We believe that all men are sinners by nature and by choice and are, therefore, under condemnation; and that salvation is by grace alone solely through faith in Jesus Christ: "...for there is none other name under heaven given among men whereby we must be saved."
அத்துடனே கூட ப்ரு தேசிய சம்மேளனத்தலைவர் (BNU) சய்பங்கா "நாங்கள் மதம் மாற மறுத்தமையால், மத மாற்ற முயற்சிகளை எதிர்த்தமையால் விரட்டப்பட்டோ ம்" எனக்கூறுவதை காட்டலாம். மேலும் ரியாங்குகளுக்காக தேசிய அளவில் குரல் எழுப்பிய வனவாசி கல்யாண ஆசிரமக்காரர்கள் அன்று கே.ஆர்.நாரயணனை சந்தித்து ரியாங்குகளின் நிலையை கூறியதையும் அதற்கு மதிப்பிற்குரிய அன்றைய குடியரசுத்தலைவரின் எதிர்வினை மௌனத்தின் காதைப்பிளக்கும் ஒலியை இன்று அவர் குஜராத் குறித்து எழுப்பும் ஒலியோடு ஒப்பிட்டுப் பார்க்கலாம். அகதி முகாம்களிலேயே 500 பேர் இறந்திருக்கிறார்கள் -நல்ல குடித்தண்ணீர் கிடைக்காத காரணத்தால் என்பது இந்த விவரணப்படத்தில் குறிப்பிடப்படலாம். இன்றைக்கு இந்த ரியாங்க் குழந்தைகளுக்கான கல்விக்கு உதவும் வகையில் வன்வாசி கல்யாண் அமைப்பினர் மாதச்சம்பளம் நானூறு ரூபாய்க்கு நிஅயமித்த ஆசிரியர்களால் இலவச வகுப்புக்கள் எடுப்பதைக் காட்டலாம். அத்துடன் கூடவே இம்மக்களுடன் இருந்து அவர்களின் சுகாதாரத் தேவைகளுக்காக தம்மையே அர்ப்பணித்திருக்கும் ஸ்ரீ இராமகிருஷ்ண மிஷனின் ஷயதானந்த மகராஜ் அவர்களுடன் இருந்து அவர்களுக்கு உதவுவதை காட்டலாம். களத்தில் எந்த உதவியும் செய்யாமல், ரியாங்குகளை ஹிந்துக்களா அல்லவா என பட்டிமன்றம் நடத்தும் சில இடதுசாரி அறிவுஜீவிகளையும், 'காஷ்மீர் பண்டிட்களுக்கு அகதி முகாம்களில் கிடைக்கும் வசதிகள் ரியாங்களுக்கு கிடைக்கவில்லை' எனப் பொய் பிரச்சாரம் செய்யும் அரசுசாரா அமைப்புகளின் குரலையும் இந்த ஆவணப்படத்தில் சொல்லி கீழ் காணும் படங்களில் பார்வையாளரிடம் ஆறுவித்தியாசம் கேட்கலாம்.




ஆனால் இத்தகையதோர் விவரணப்படம் வரப்போவதில்லை. ஏனெனில் அவ்வாறு வந்தால் அப்படம், சேவை, காருண்யம் ஒரு கன்னத்தை அறைந்தால் மறுகன்னத்தை காட்டும் அன்பு போன்ற வெளித்தோல்களுக்கு அப்பால் உள்ளிருக்கும் இராட்சத விலங்கு எப்படி அம்மணமாக ஆட்டம் போடுகிறது என்பதை காட்டக்கூடும் அத்துடனே கூட எப்படி இன்றும் நிகழும் மத்தியகால புனித விசாரணைகளை மிஞ்சும் கொடுமைகளுக்கு, ஹிட்லர் ஆறு மில்லியன் யூதர்களை கொன்ற போது மவுனித்த 'நாகரிக மேற்குக்கொப்ப' இங்கிருக்கும் மதச்சார்பற்ற ஊடகங்கள் அமைதி காத்து துணை போகின்றன் என்பதையும் இந்த விவரணப்படம் காட்டக்கூடும். எனவே இந்த விவரணப்படம் வருவது நடவாத ஒன்று.

---

இங்கிருக்கும் ரியாங்க் குழந்தைகளின் முகத்தை ஒருமுறை பார்த்துக்கொள்ளுங்கள். நீங்கள் ஆபிரகாமிய மார்க்கத்தை சாராதவராக இருப்பின் நாளை உங்கள் குழந்தைக்கும் இக்கதி வரலாம் என்பதை ஞாபகப்படுத்திக் கொள்ளுங்கள்.