பாலபாரதியுடன் ஒரு சந்திப்பு

முதலில் தங்கவேல் பாலபாரதியை சந்திக்கலாம் என்று சொன்னபோது வேண்டாம் என்றுதான் சொன்னேன். ஆனால் தங்கவேல் 'நீ கொண்டிருப்பது தேவையற்ற மனத்தடை' என விளங்கும்படி எடுத்துரைத்தார். சரி என்று சொல்லிவிட்டேன். வெயில் கொளுத்தும் மதிய வேளையில் ஏறக்குறைய ஒன்றரை மணிக்கப்பால் வந்தார் தங்கவேல். அவருக்கும் அன்று பார்த்து அலுவலகத்தில் எக்கசக்க வேலை. கொடுத்த வாக்குக்காக அந்த வெயிலில் வந்திருந்தார் மனிதர். பாலபாரதி ஏற்கனவே டென்ஷனாகி 'டாண்ணுன்னு சரியான நேரத்துக்கு சாப்பிடறவனை இப்படி பட்டினி போடுறீயளே இது சரியா இது முறையா இது தருமம்தானா' என்று செய்திகள் அனுப்பிக்கொண்டிருப்பதாக கூற இருவருமாக உட்லண்ட்ஸ் விரைந்து அங்கே எங்களுக்காக காத்துக்கொண்டிருக்கும் பாலபாரதியை தேடினால் அங்கே எங்களுக்கு ஒரு அதிர்ச்சி காத்துக்கொண்டிருந்தது. இந்த இடத்தில் ஒரு (தொடரும்) போட்டால் நன்றாக இருக்கும்.

பாலபாரதியை காணவில்லை. உள்ளேயும் வெளியேயுமாக தேடியபடி தங்கவேல் செல்லடித்தபடி, செல்லை தூக்கும் உருவத்தை தேடிக்கொண்டிருந்தார். நானும் தேடினேன். அப்போதுதான் தெரிந்தது பாலபாரதி அப்போதுதான் கிளம்பியிருக்கிறார் என்று. தங்கவேல் காத்திருக்கிற நேரத்தில் உட்லண்ட்ஸ் ஹோட்டல் மகாத்மியத்தை கூறினார். இங்குதான் திருவாளர் டோ ண்டு தமது பதிவாளர் கூட்டங்களை நடத்துவார், அவருக்கு பிடித்த போண்டா இங்குதான் கிடைக்கும் இத்யாதி. அந்த நேரத்தில் ஒரு ராட்சத கை ஒன்று என் தோளில் விழுந்தது. திரும்பி பார்த்த நான் அப்படியே உறைந்து போனேன். இங்கும் ஒரு (தொடரும்)

அங்கே நெடுமால் திருமுருகா என நின்று கொண்டிருந்த ஒரு உருவம்தான் பாலபாரதி என தெரிந்தது. போட்டோ வில் மனிதர் இன்னும் மெச்சூற்டாக தெரிகிறார் என்பதுதான் உண்மை. உள்ளே போனோம். சாப்பாடு கிடையாது டிபன்தான் என சர்வர் சொல்லிடவே டிபனையே ஆர்டர் செய்துவிட்டு பேச ஆரம்பித்தோம். டெஸிபெல்களை குறைத்துக்கொள்ளுங்கள் என்றார் தங்கவேல். அறிவொளி காலங்களில் தான் நாடகத்தில் நடித்த போது உச்சஸ்தாயியில் மாடுலேஷன்களுடன் பேசி அதுவே பழக்கமாகி விட்டது என்றார் பாலபாரதி. சாதியம், ஐயா வைகுண்டர், கலப்பு திருமணம், இந்துத்வம், ஈவெரா என சிறிது நேரம் புன்னகையோடு பொறி பறந்தது. கருத்து எதுவானாலும் மனிதர்கள் நண்பர்களாக இருக்க முடியும் என அவ்வப்போது நினைவுப்படுத்துவதும் கூடவே நடந்தது. தங்கவேல் அமைதியாக சாட்சிபூதனாக அமர்ந்திருந்தார். சாப்பிட்டு முடித்து வெளியே வந்தோம். சிறிதுநேரம் நின்றவாறே அவரது இராமேஸ்வரம் நாட்களைக் குறித்து பேசினார் பாலபாரதி. வெகுளித்தனமும், தன்னம்பிக்கையும், புத்தக அறிவை விட தன்னுடைய அனுபவ அறிவையே மதிக்கும் மனதிண்மையும் கொண்ட ஒரு நல்ல நேர்மையான இளைஞரை பார்த்த நிறைவான அனுபவம் அன்று கிடைத்தது. தங்கவேலுக்குத்தான் நன்றி சொல்லவேண்டும். அப்புறம் அங்கே பாலபாரதியின் முகத்துக்கு நேராக சொல்ல நினைத்து சொல்ல முடியாத இரண்டு விசயங்களை இங்கே சொல்லிவிடுகிறேன்.

ஒன்று: ஒருமுறை அவரை நேர்மையற்றவர் என குறிப்பிட்டிருந்தேன். அவரைப் பார்த்த அந்த முக்கால் மணிநேர சந்திப்பின் இறுதியில் நான் உணர்ந்தது யாதெனில் அவர் எதுவாக இருந்தாலும் நேர்மையற்றவர் அல்லர். அவ்வாறு குறிப்பிட்டதற்காக அவரிடம் மன்னிப்புதான் கேட்கவேணும்.பொதுவாகவே எதிர்மறை அடைமொழிகள் கொடுப்பது சரியான விசயமல்லதான். ஆனால் எதிரணியினர் எப்போதும் அடைமொழிகளாலும் முத்திரை குத்தலாலும் விளித்து அதையே அறிவுசீவி வாதமாக ஆக்குவதால் ஏற்படக்கூடிய எதிர்வினை இது. எதுவானாலும் நல்ல ஆரோக்கியமான உரையாடலுக்கு அது உகந்ததல்லதான். எனவே இனி கருத்தியல் எதிரிகளை தேவையற்ற அடைமொழிகளை கொண்டு விளிப்பதில்லை என முடிவு எடுத்துக்கொண்டேன். அதனை அப்படியே நூறுசதவிகிதம் கடைப்பிடிப்பேன் என சொல்ல முடியாது. இடதுசாரி அரசு செய்கிற கொடுமைக்கும் பூணூல் கலியாணம் என கூறுகிற பூங்காத்தனத்தை பார்க்கும் போது கடைந்தெடுத்த நேர்மையின்மை என்றுதான் எனக்கு சொல்ல வருகிறது. ஆனால் முடிந்தவரை கடைப்பிடிப்பேன்.

இரண்டு: பாலபாரதி கன்னியாகுமரி பக்கம் வந்தால் கட்டாயம் வீட்டுக்கு வாருங்கள்...வந்தால் தங்கி செல்கிற மாதிரி வாருங்கள். பிறகு தங்கவேலும் நானும் ஒரு இரண்டு மணிநேரம் பேசிக்கொண்டிருந்தோம். பல விஷயங்களைக் குறித்து பேச்சு சுவாரசியமாக நீண்டது. ஒரு தருணத்தில் வேறுவழியில்லாமல் பேச்சை நிறுத்தி விடைபெற்றுக்கொண்டோம்.