ஸ்டாலினுக்கு தெரியும்....ஹிட்லரை

பொதுவாக இரண்டாம் உலகப்போரில் சோவியத்கள் நாசிகளை தோற்கடித்ததை கம்யூனிஸ்ட்கள் பெரிதாக சொல்லிக்கொள்வார்கள். ஸ்டாலினை ஹிட்லரை மாய்ப்பதற்காகவே அவதாரம் செய்தவனாக பிரச்சாரம் செய்தும் வந்தனர். இந்த பிரச்சாரத்துக்கு நல்ல பலன் இருந்தது. ஆனால் உண்மையில் ஹிட்லர் ஐரோப்பாவில் தன்னை விஸ்தீகரித்து வந்த காலகட்டத்தில் அவனுக்கு பெரும் வகையில் தோள் கொடுத்து வந்தது ஸ்டாலினே ஆகும். இந்த உண்மை 1989 இல் சோவியத் அரசே வெளியிட்ட உண்மையாகும். சோவியத் யூனியன் வெளியிட்ட 'ஸ்புட்னிக்' இதழ் பலருக்கு நினைவு இருக்கலாம். ஆகஸ்ட் 1989 இல் ஸ்புட்னிக் இதழ் 'Why did the Second World War happen?' என ஒரு கட்டுரையை பல பழைய இதுவரை வெளியே வெகு அருகியே தெரிந்திருந்த சோவியத் ஆவணங்களின்/அக்கால சோவியத் செய்திகளின் அடிப்படையில் வெளியிட்டது. அதில் இருக்கும் விசயங்களை இங்கு அப்படியே மீள்-பிரசுரம் செய்கிறேன்.

ஆகஸ்ட் 24 1939 சோவியத் செய்திதாள் இஸ்வெஸ்ஷியா (Izvestia) எழுதியது: USSR -மக்கள் அமைச்சு மையம் மற்றும் அதன் வெளியுறவுத்துறையின் சேர்மன் மோலோடோ வ் மற்றும் ஜெர்மானிய வெளியுறவு ஹெர் வான் ரிபந்த்ராப் ஆகியோர் ஸ்டாலின் முன்னிலையில் ஏறத்தாழ மூன்று மணிநேரம் பேச்சு வார்த்தைகள் நடத்தினர். அதன் பின்னர் சிறிய இடைவெளி. அதற்கு பின்னர் இருவரும் பரஸ்பர ஆக்கிரமிப்பு இன்மைக்கான ஒப்பந்தத்தைக் கையெழுத்திட்டனர். இந்த ஒப்பந்தம் பின்வருமாறு:

"ஒப்பந்தமிடும் இரு தரப்பினரும் தம்மிடையே அனைத்து வித வன்முறை, ஆக்கிரமிப்பு நடவடிக்கைகள், தாக்குதல்கள் ஆகியவற்றினை தனியாகவும் பிற நாட்டு கூட்டணியுடனும் இல்லாமல் ஆக்குவார்கள். இருதரப்பினரும் தம்மில் ஒருவருக்கு எதிரான மற்றொரு நாடு அல்லது அணியுடன் சேர்ந்து கொள்ளமாட்டார்கள். இந்த உடன்படிக்கை கையெழுத்திட்ட நாளிலிருந்து பத்து ஆண்டுகளுக்கு அமுலில் இருக்கும்."

• செப்டம்பர் 1 1939: ஜெர்மனி போலந்தின் மீது படையெடுக்கிறது.
  
• செப்டம்பர் 3 1939: பிரிட்டனும் பிரான்சும் ஜெர்மனி மீது போர் பிரகடனம் செய்கின்றன.
  
• செப்டம்பர் 17 1939: சோவியத் யூனியன் போலந்துடன் செய்த பரஸ்பர ஆக்கிரமிப்பின்மை ஒப்பந்தத்தை நாசி ஜெர்மனிக்கு ஆதரவாக முறித்துக்கொள்கிறது.
  
• செப்டம்பர் 18 1939 சோவியத் செய்திதாள் இஸ்வெஸ்ஷியா (Izvestia) இந்த ஒப்பந்த முறிவு பிரகடனத்தை பிரசுரித்தது. "சோவியத் அரசாங்கம் போலந்து மக்களை -அவர்களது விவேகமற்ற தலைவர்களால் தள்ளப்பட்ட இந்த மோசமான போரின் விளைவுகளிலிருந்து காப்பாற்றி அவர்கள் அமைதியான வாழ்க்கை வாழ வழிவகை செய்கிறது." (போலந்திற்கு நேர்ந்த படுதுயரின் பழி நாசி ஆக்கிரமிப்பின் மீது அல்ல மாறாக போலந்து தலைவர்கள் மீது போடப்படுவதை கவனிக்கவும்.)
  

செப்டம்பர் 23 1939: ஜெர்மனியும் சோவியத் யூனியனும் தமக்குள் போலந்தினை பங்கு போட்டுக்கொண்டன. சோவியத் செய்திதாள் இஸ்வெஸ்ஷியாவின் செப்டம்பர் 29 1939 இல் சோவியத் யூனியனும் நாசி ஜெர்மனியும் போலந்தை பங்கு போடுவதைக் குறித்து இருநாட்டு பிரதிநிதிகளும் கையெழுத்திட்ட அறிக்கையை வெளியிட்டது:

"போலந்தின் அரசு கரைந்தழிந்ததையடுத்து சோவியத் சோஷலிச மக்கள் கூட்டரசும் ஜெர்மானிய அரசும் அப்பகுதியில் அமைதியையும் ஸ்திரத்தன்மையையும் உருவாக்க வேண்டியதும் அங்குள்ள மக்கள் தம் தேசியத்தன்மைக்கு ஏற்ப வாழவைக்க வேண்டியதுமான பெரும் பொறுப்பினை தமக்கே பிரத்யேகமான பொறுப்பாக ஏற்றுக்கொள்கிறது. இதனை மனதில் கொண்டு சோவியத் அரசும் ஜெர்மானிய அரசும் தமது பரஸ்பர ராச்சியங்களின் எல்லைக்கோட்டினை பழைய போலந்து நாடு இருந்த பிரதேசத்துக்கு மாற்றி அமைத்துக்கொள்கின்றன. அந்த எல்லைக்கோடு இந்த ஆவணத்துடன் இணைக்கப்பட்டுள்ள பழைய போலந்தாக இருந்த பிரதேசத்தின் வரைப்படத்தில் காட்டப்பட்டுள்ளது. இது குறித்த மேலதிக விவரங்கள் மற்ற ஒப்பந்த நடபடிகளில் (protocol) உள்ளன. மேற்கூறிய எல்லைக்கோட்டின் மேற்கே இருக்கும் பகுதிகளில் தேவைப்படும் தேசிய சீரமைப்புகளை ஜெர்மனி செய்து கொள்ள வேண்டியதும் அந்த எல்லைக்கோட்டுக்கு கிழக்கு பகுதியில் உள்ள பிரதேசத்தின் தேசிய சீரமைப்பினை சோவியத்தும் செய்துகொள்ள வேண்டியதுமாகும்."

இதனைத் தொடர்ந்து சோவியத் யூனியன் மற்றும் நாசி ஜெர்மனி ஆகியவற்றின் சார்பாக பிரிட்டனிடம் போர் நிறுத்தம் செய்யும் கோரிக்கையை ஹிட்லர் வைத்தான். அவன் கூறினான்: "மிகக்குறைந்த காலகட்டத்துக்குள் அமைதியை ஏற்படுத்த சோவியத்தும் ஜெர்மனியும் எவ்வளவோ முயன்ற போதும் அவையெல்லாம் தோற்றுப்போனால் இந்த போர் நீண்டுகொண்டு போவதற்கான பொறுப்பினை பிரிட்டனும் பிரான்ஸும்தான் ஏற்க வேண்டும்."

• 1940: ஜெர்மனி டென்மார்க், நார்வே ஆகிய நாடுகளை ஆக்கிரமிப்பதுடன் பெல்ஜியத்தின் மீதும் படையெடுக்கிறது.
  
• 1941: ஜெர்மனி யுகோஸ்லேவியாவைக் கைப்பற்றுகிறது. கிரேக்கத்தையும் பிடிக்கிறது.
  
• ஜூன் 22 1941 இல் ஜெர்மனி சோவியத்தை தாக்குகிறது.
  

சோவியத் ஏன் நாசிக்களுடன் அமைதி உடன்படிக்கையை ஏற்படுத்தியது என்பதற்கு ஸ்டாலினே ஒரு விளக்கம் அளிக்கிறான். ஜூலை 3 1941 ஸ்டாலினின் உரை:

"அரக்கர்களான ஹிட்லர் ரிபந்த்ராப் ஆகியோருடன் சோவியத் அரசாங்கம் ஒப்பந்தம் செய்துகொண்டது முறையா தவறல்லவா என ஒரு கேள்வி எழலாம். அதற்கு பதில் 'தவறு இல்லை' என்பதுதான். ஜெர்மனியுடன் பரஸ்பர ஆக்கிரமிப்பு இன்மை ஒப்பந்தம் செய்யப்பட்டதனால் நமக்கு என்ன கிடைத்தது? ஒன்றரை வருடம் நம்
நாட்டிற்கு அமைதி கிடைத்தது. நம் நாட்டின் மீது ஜெர்மனி ஒப்பந்தத்தை மீறி ஆக்கிரமிப்பு நடத்திடும் பட்சத்தில் அந்த ஆக்கிரமிப்பை தோற்கடிக்கும் திறன் வாய்ந்தவாறு
இராணுவத்தை பலப்படுத்த நமக்கு வாய்ப்பு கிடைத்தது. இது நிச்சயமாக நமக்கு நல்ல வாய்ப்பாகவும் நாசி ஜெர்மனிக்கு மோசமான நிலையாகவுமே அமைந்தது."

ஸ்டாலினின் இந்த வியாக்கியானமே மீண்டும் மீண்டும் அவனது இராசதந்திரமாகக் கூறப்பட்டு வந்துள்ளது. 'மாபெரும் தேசபக்த போராட்டம்' குறித்து பின்னர் எழுதப்பட்ட அனைத்து
சோவியத் பிரச்சார நூல்களிலும் இந்த இராசதந்திரம் வியந்தோதப் பட்டுள்ளது. ஆனால் உண்மையிலேயே ஸ்டாலினின் ஹிட்லரின் தாக்குதலை எதிர்பார்த்தானா? ஸ்டாலின்
ஹிட்லருடன் செய்து கொண்ட ஒப்பந்தம் மேம்போக்கானதுதானா? இந்த ஒப்பந்தத்துக்கு அப்பால் சோவியத் மக்களையும் இராணுவத்தையும் ஸ்டாலின் உண்மையிலேயே ஒரு
போருக்கு ஆயத்தப்படுத்தி வந்தானா? சோவியத் பிரச்சாரத்துக்கு அப்பால் சோவியத் ஆவணங்கள் கூறுகிற தகவல்கள் சுவாரசியமானவை. Military Historical Journal of the USSR - Ministry of defence 1963 - அக்கால நிலையைக் குறித்து ஆராய்ந்து கூறுகிறது:

"ஸ்டாலினின் இராணுவ -இராஜ தந்திர கணிப்புகள் தவறாகிப் போன காரணத்தால் சோவியத்தின் இராணுவ பொருளாதார கட்டமைப்பு சரியான முறையில் இராணுவ கருவிகள் செய்ய பயன்படுத்தப் படவில்லை. போருக்கு முன்னர் நமது விமான தயாரிப்புசாலைகள் புதிய விமானங்களை அப்போதுதான் வடிவமைத்துக்கொண்டிருந்தன. எனவே போரின் போது வெறும் 20 மிக்-3 விமானங்களும் இரண்டே இரண்டு பி(Pe)-2 பாம்பர்களும் இருந்தன. நாசி ஜெர்மனியின் ஆக்கிரமிப்புக்கு முன்னர் வரைக்கும் கூட இயந்திர துப்பாக்கிகள் உற்பத்தி குறைந்துவிட்டது. ஆக்கிரமிப்பு ஏற்பட்டால் மிகவும் அத்யாவசியமான டாங்கி எதிர்ப்பு கணைகளின் தயாரிப்பும் காரணமின்றி நிறுத்தப்பட்டது."

ஸ்டாலினின் பிரச்சார பிம்பத்தை கலைக்காத History of the Great Patriotic war இல் கூட ஸ்டாலின் கூறியபடி சோவியத் அந்த ஒன்றரை வருடங்களில் தாக்குதலுக்கு தயாரான நிலையில் இருப்பதாக கூறப்படவில்லை.

"போர் தொடங்கிய நிலையில் 7 விழுக்காடு சோவியத் அதிகாரிகளே உயர் இராணுவ பயிற்சி பெற்றவர்களாக இருந்தனர். 75 விழுக்காடு கமாண்டர்கள் பதவியேற்று ஒரு வருடம் கூட ஆகாதவர்களாக இருந்தனர். இராணுவ அமைச்சர் குலிக் சப்-மெஷின் துப்பாக்கிகள் தேவையற்ற ஆயுதங்கள் என்று ஒரு கண்டிப்பான எண்ணம் கொண்டிருந்தார்,..உணவு உற்பத்தியும் போதுமானதாக இல்லை. கால்நடைகளும் பற்றாகுறைதான். 1916 இல் இருந்த நிலையைக் காட்டிலும் 1941 இல் கால்நடைகளின் எண்ணிக்கை குறைந்து காணப்பட்டது...ஆனால் அதே காலகட்டத்தில் ஜெர்மானிய போர் கருவி உற்பத்தி எழுபது விழுக்காடு அதிக வளர்ச்சி பெற்றது."

சோவியத் வரலாற்றாசிரியை நினா க்ரோயோக்கா கூறுகிறார் (Soviet German Treaty, பக்.115 ஸ்புட்னிக் ஆகஸ்ட் 1989)

"மேலும் ஜெர்மனி தனக்கு கிடைக்க வேண்டிய தாதுப்பொருட்களையெல்லாம் அதிக அளவில் பெற்று வந்தது. அதன் நிலக்கரி சேமிப்பு இரண்டு மடங்கானது. இரும்புக்கனிமம் 7.7 விழுக்காடு அதிகமானது தானியங்களோ 4 மடங்கானது. இந்த விரிவாக்கத்திற்கு பின்னால் ஒழுங்காக முக்கிய பொருட்களை சோவியத் அளித்தது முக்கிய காரணமாக இருந்தது." உதாரணமாக ஜனவரி 11 1941 இல் ப்ராவ்தா கூறுகிறது:"சோவியத் சோஷலிச மக்கள் குடியரசு ஜெர்மனிக்கு தொழிற்சாலைக்கு தேவையான கச்சாப்பொருட்கள், எண்ணெய் கனிம பதப்படுத்தப்பட்ட பொருட்கள், உணவுப்பொருட்கள் மற்றும் தானிய வகைகளை அளிக்கும்."

இதில் கொடுமை என்னவென்றால் சோவியத்திலேயே மக்களுக்கு உணவுபற்றாகுறை இருந்த போதுதான் ஸ்டாலினுக்கு ஹிட்லரின் ஜெர்மனிக்கு இப்படி உதவி செய்ய தோன்றியது.

சோவியத் மீது ஜெர்மனி படையெடுக்கக் கூடுமென பிரிட்டன் அரசியல் ஆருடம் கூறியது. மக்களிடையேயும் இந்த வதந்தி பரவிய போது அதனை ஸ்டாலின் எதிர்கொண்ட விதம்
அலாதியானது. ஜூன் 14 1941 சோவியத் பிரச்சார ஸ்தாபனமான டாஸ் (TASS) அறிக்கை கூறுகிறது:

"பொதுவாக வெளிநாட்டு பத்திரிகைகளும் குறிப்பாக பிரிட்டிஷ் பத்திரிகைகளும் ஜெர்மனிக்கும் சோவியத்துக்கும் விரைவில் மீளப்போகும் போரினைக் குறித்து பேசி வருகின்றன. இந்த வதந்தி மடத்தனமானது என்றாலும் கூட சோவியத் மேலிடம் மக்களுக்கு இதனைக் குறித்த உண்மையை தெளிவுபடுத்த வேண்டுமென விரும்புகிறது. இந்த வதந்திகள் உண்மையில் அசிங்கமான பிரச்சார தந்திரம். இந்த அசிங்கமான பிரச்சார தந்திரம் ஜெர்மனிக்கும் சோவியத்துக்கும் எதிரான சக்திகளால் போரினை மேலும் விஸ்தீகரிப்பதற்காகவும் புதிய போர்களை உருவாக்குவதற்காவும் செய்யப்படுவதாகும்."

ஜூன் 22 1941 இல் நாசிகள் சோவியத்தை தாக்கினர். பல இலட்சம் மக்கள் ஸ்டாலினின் அலட்சியப் போக்கினால் நாசி வெறியர்களுக்கு பலியானார்கள். என்றாலும் நேசநாடுகளின் தாக்குதல் ஒருபுறம் நெருக்க மறு புறம் சோவியத் மக்களின் வீரமும் தியாகமும் நாசிகளை வீழ்த்தியது. அதற்கு சோவியத் குடியரசுகளின் மக்கள் கொடுத்த விலை கொடூரமானது. அந்த கொடூர மானுட சோகத்துக்கு ஆக்கிரமிப்பாளன் ஹிட்லர் எவ்வளவு காரணமோ அதே அளவு சொந்த நாட்டைக்குறித்து கவலைப்படாமல் நாசி ஜெர்மனியுடன் சரசமாடிய ஸ்டாலினும்
காரணம்தான்.

ஸ்டாலினின் அயோக்கியத்தனமான துரோகம்.

இந்த கொடுமைகளிலெல்லாம் பெரிய கொடுமை போலந்துக்கு எதிராக ஸ்டாலின் செய்த துரோகம்தான். போலந்துடன் சோவியத் பல உடன்படிக்கைகளை செய்திருந்தது - பரஸ்பர
ஆக்கிரமிப்பின்மை உடன்படிக்கை உட்பட பல உடன்படிக்கைகளை செய்திருந்தது. ஆனால் 1939 செப்டம்பரில் ஜெர்மனி போலந்துடன் படையெடுப்பதற்கு முன்னரே ஆகஸ்டில்
ஸ்டாலின் ஏற்படுத்திய சோவியத்-நாசி ஒப்பந்தத்தில் போலந்தை எப்படி இரண்டு நாடுகளும் பங்கு போட்டுக்கொள்வது என்பது ஏற்பாடாகிவிட்டது. நாளைக்கு போலந்தின் மீது
ஜெர்மனி படையெடுக்கும் போது எந்த பகுதி சோவியத்துக்கும் எந்த பகுதி ஜெர்மனிக்கும் போகவேண்டும் என்பதனை ஸ்டாலின் ஹிட்லரின் பிரதிநிதியுடன் பேசி முடிவு
செய்துவிட்டான். எல்லைக்கோடு வரை வரையறுக்கப்பட்டுவிட்டது. இதில் வேடிக்கை என்னவென்றால் இந்த பங்குபோடும் ஒப்பந்தத்தை ஹிட்லரின் அரசிடம் ஸ்டாலின் நிறைவேற்றிக் கொண்டிருந்த போது, தன் பலியாக்கி பங்கு போடப்போகும் போலந்துடன் சோவியத் நட்பு ஒப்பந்தம், பரஸ்பர-ஆக்கிரமிப்பின்மை ஒப்பந்தம் எல்லாம் செய்து வைத்திருந்ததுதான்.


பின்னாளில் ஆஷ்ட்விச் முதல் பல கொடுமையான இன ஒழிப்புகளையும் கொடூரங்களையும் நாசிகள் போலந்து பிரதேசங்களில்தான் அரங்கேற்றினார்கள். ஸ்டாலின் கரங்களில்
அதிகமாக படிந்த இரத்தகறைகளில் போலந்தில் நாசிகள் நடத்திய கொலை வெறியாட்டங்களுக்கான பொறுப்பும் போய் சேரத்தான் சேரும். 1939 இன் சர்ச்சைக்குரிய இந்த ஒப்பந்தத்தை சோவியத் லித்துவேனியாவின் அரசியல் விமர்சகர் விலியஸ் கவலியாஉஸ்கஸ் அதே ஸ்புட்னிக் இதழில் வெளிப்படுத்தினார். ஆம்...புதுமைப்பித்தன் சொன்னபடி 'ஸ்டாலினுக்கு தெரியும்'...புதுமைப்பித்தன் கற்பனை செய்து பார்க்கமுடியாத விதத்தில்